കുഞ്ഞൂട്ടന്റെ കുറിഞ്ഞി!!

പ്രീയ കുഞ്ഞൂട്ട...

ഇവിടെ മഴ തന്നെ ആണ്. അവിടെയും മഴ തന്നെ എന്ന് അറിഞ്ഞു. കുഞ്ഞൂട്ടൻ സേഫ് അല്ലെ? ഞാൻ സേഫ് ആണ്.

കുഞ്ഞൂട്ടന്റെ കത്ത് കിട്ടിയപ്പോൾ ഒരുപാട് സന്തോഷം ആയി. ഒപ്പം സങ്കടവും!!

കുഞ്ഞൂട്ടന്റെ കത്ത് ആദ്യം വായിച്ചതിനേക്കാൾ അധികം എന്നെ ഇന്ന് അത് ഒരുപാട് കരയിച്ചു. അതിനു കാരണം എന്റെ മുതലാളി ഇനി കുഞ്ഞൂട്ടന്റെ ബോസ്സുമായി ഒരു ബിസിനസ്സും ഇല്ല എന്ന് അച്ഛനെ ആണയിട്ട് പറഞ്ഞു എന്നതാണ്.

അതിനർത്ഥം നമ്മൾ ഇനി ഒരിക്കലും നേരിൽ കാണുകയില്ല എന്നാണ്.

കുഞ്ഞൂട്ട... അവർ രണ്ടാൾക്കും ഈഗോ ആണ്.രണ്ടാളും പരസ്പരം കുറ്റങ്ങൾ കണ്ടുപിടിച്ചു വിളിച്ചു പറഞ്ഞു മറ്റേ ആളുടെ ചിന്തകളെയും സ്വഭാവത്തെയും മാറ്റുവാൻ ശ്രമിക്കുന്നത് എന്ത് മണ്ടത്തരം ആണെന്ന് അവർ അറിയുന്നില്ലല്ലോ.ഓരോരുത്തരും എങ്ങിനെ ആണോ അതുപോലെ അംഗീകരിച്ചു മുന്നോട്ട് പോകുന്നത് അല്ലെ നല്ല ബിസിനസ്സ് ബന്ധങ്ങൾക്ക് ഗുണം ചെയ്യുക??

അവർക്ക് അവർ ആയി തന്നെ നിന്നുകൊണ്ട് പരസ്പര സഹകരണത്തോടെ പോകുവാൻ സാധിക്കില്ലേ?? എന്റെ മുതലാളി ചിന്തിക്കുന്നത് അടിമുടി മാറ്റം, അതും മുതലാളി പറയും പോലെ മാത്രം. കുഞ്ഞൂട്ടന്റെ ബോസ്സ് അതിനു തയ്യാറും അല്ല. മനുഷ്യർ എന്ത് വിഡ്ഢികൾ ആണല്ലേ??ഒന്നേൽ ആരേലും ഒരാൾ വിട്ടുവീഴ്ച ചെയ്യണം. എന്റെ അഭിപ്രായത്തിൽ രണ്ടാളുകളും ഒരുമിച്ചിരുന്നു സംസാരിച്ചാൽ തീരുന്ന നിസ്സാര പ്രശ്നങ്ങളെ അവർക്കിടയിൽ ഉള്ളു.

ലോകം ഒട്ടും കാണാത്തതിന്റെ അറിവ്കേട് ആണ് എന്റെ മുതലാളിക്ക്. കുഞ്ഞൂട്ടന്റെ ബോസ്സിന് ലോകം കൂടുതൽ കണ്ടതിന്റെ കുഴപ്പം ആണ്.

എന്തായാലും.. രണ്ടും രണ്ടുവഴിക്ക് ആയി. ഹൃദയങ്ങൾ പരസ്പരം മുറിച്ചുകൊണ്ട് അവർ രണ്ടും എന്ത് നേടി എന്നറിയില്ല!! ബെറ്റർ ബിസിനസ്സ് പാർട്ണർ ആണ് എന്റെ മുതലാളി തേടുന്നത്.ബിസിനസ്സ് രംഗം തന്നെ ഉപേക്ഷിക്കുന്നു എന്നാണ് കുഞ്ഞൂട്ടന്റെ ബോസ്സ്ന്റെ നിലപാട്.

കഷ്ടം! രണ്ടാളുടെയും ഈഗോയും ആറ്റിട്യൂടും ആലോചനഇല്ലാത്ത വാശികളും പിണക്കങ്ങളും കാരണം ഭാവിയിൽ ലോകം അസൂയയോടെ കാണുമായിരുന്ന ഒരു ബിസിനസ്സ് സാമ്രാജ്യം ഇല്ലാതായി. ഒപ്പം നമ്മുടെ സ്വപ്നങ്ങളും!!

കുഞ്ഞൂട്ടന്റെ നാട്ടിലൂടെ കുഞ്ഞൂട്ടനോട് ചേർന്ന് ഒരുപാട് സ്വപ്നങ്ങൾ ഞാനും കണ്ടിരുന്നു. അവയെല്ലാം ഇനി എന്നിൽ തന്നെ ഒതുങ്ങട്ടെ. അല്ലേലും എന്റെ സ്വപ്നങ്ങൾക്ക് ആരും വില നൽകാറില്ല. ഞാനിവിടെ ഉണ്ടെന്ന് പോലും എന്റെ മുതലാളി അറിഞ്ഞത് ഈ അടുത്താണ്. അതും കുഞ്ഞൂട്ടൻ കാരണം.

എനിക്കറിയാം കുഞ്ഞൂട്ടന് ഒരിക്കൽ പോലും എന്നെ ഒന്ന് കാണുവാനോ കേൾക്കുവാനോ പറ്റിയിട്ടില്ല എന്ന്.എന്റെ സന്തോഷത്തിനു വേണ്ടി മൂന്നു തവണയും കുഞ്ഞൂട്ടൻ മാറിനിന്നു എന്നും എനിക്കറിയാം. അതിന്റെ എല്ലാം കടം തീർത്ത് കുഞ്ഞൂട്ടനെ സ്നേഹിച്ചു കൊല്ലണം എന്ന് കരുതിയിരുന്നത.

ഇനി എല്ലാം വെറും സ്വപ്നങ്ങൾ മാത്രം. എന്റെ മുതലാളി പുതിയ ബിസിനസ്സ് ബന്ധത്തിലൂടെ... കുഞ്ഞൂട്ടനെ പോലെ ആർക്കേലും എന്നെ കൊടുക്കുമായിരിക്കും. 

പക്ഷെ... 

കുഞ്ഞൂട്ടനെ പോലെ ആരേലും അല്ല ഞാൻ ആഗ്രഹിച്ചത്. മുതലാളിക്ക് പോലും വേണ്ടായിരുന്ന എനിക്ക് ആദ്യമായി ഒറ്റപ്പെടൽ മാറ്റി സന്തോഷത്തിന്റെ മാർഗങ്ങൾ കാണിച്ചു തന്ന കുഞ്ഞൂട്ടനെത്തന്നെ വേണമായിരുന്നു എനിക്ക്.

കുഞ്ഞൂട്ട... എന്താ അവർക്ക് ബോധം വരാത്തത്. ഒരുമിച്ചു നിൽക്കുന്നത് ആണ് പിരിഞ്ഞു പോകുന്നതിലും ബിസിനസ്സിന് നല്ലത് എന്നവർ ചിന്തിക്കാത്തത് എന്താ??നിസ്സാര കാര്യങ്ങൾ ക്ഷമിക്കാൻ ഈ മനുഷ്യർ എന്നാ ഇനി പഠിക്കുക? മരിക്കുമ്പോൾ ഇത്തരം വാശിക്കൊണ്ട് എന്തേലും ഇവർ നേടുമോ കുഞ്ഞൂട്ട??

ഹൃദയം മുറിച്ചു കൊണ്ടുള്ള ഒരു ഈഗോ കൊണ്ടും ആരും ഒന്നും നേടില്ല എന്ന് അവർ രണ്ടും ഒരിക്കൽ തിരിച്ചറിയും.എന്തൊക്കെ ഈ ലോകത്ത് കാണിച്ചു കൂട്ടിയാലും ഒരുനാൾ ഈ മണ്ണിൽ കൊഴിഞ്ഞു വീഴും എല്ലാവരും എന്ന് തിരിച്ചറിഞ്ഞു വരുമ്പോളേക്കും... ഒരുപാട് വൈകിയിട്ടുണ്ടാകും. പിന്നീട് ഒരുമിച്ചൊരു ബിസിനസ്സും ഇനി പറ്റില്ല എന്ന രീതിയിൽ കാലം മുന്നോട്ട് ഓടിയിട്ടുണ്ടാകും... ഒരുപാട് ദൂരേക്ക്!!

തെറ്റുകളും കുറവുകളും ഇല്ലാത്ത ആളുകൾ ആരും ഇല്ല. തെറ്റുകൾ തിരുത്താൻ സാധിക്കും. തെറ്റിദ്ധാരണകൾ മനസ്സിലാക്കി വരുമ്പോളേക്ക് ഇനി ഒരു തിരുത്തൽ പറ്റാത്ത വിധം എല്ലാം തീർന്നിട്ടുണ്ടാകും.

കുഞ്ഞൂട്ടാ... കുഞ്ഞൂട്ടൻ വിഷമിക്കും എന്നറിയാം. എനിക്ക് ഓടി വരണം എന്നുണ്ട്. പക്ഷെ... ഞാൻ നിസ്സഹായ ആണ്.കുഞ്ഞൂട്ടനെ ഓർക്കുവാൻ പോലും എന്റെ മുതലാളി ഇനി സമ്മതിക്കുമോ എന്നറിയില്ല.പാവം എങ്കിലും പിടി വാശി കൂടുതൽ ആണ്

കുഞ്ഞൂട്ടന്റെ ബോസ്സ്നെ എന്റെ മുതലാളി ശത്രുവിനെ പോലെ കണ്ടു തുടങ്ങി എന്ന് തോന്നുന്നു. ഒരുപാട് തവണ അവിടുന്ന് വിളിച്ചു. പക്ഷെ എന്റെ മുതലാളി തിരിഞ്ഞു നോക്കിയില്ല.

കുഞ്ഞൂട്ട.. കുഞ്ഞൂട്ടനുള്ള പോലെ ഒരുപാട് കഥകൾ എനിക്കും ഉണ്ടായിരുന്നു കുഞ്ഞൂട്ടന് മുന്നിൽ പറയാൻ.എല്ലാ മോഹങ്ങളും ഉരുൾപൊട്ടലിൽ പെട്ടപോലെ എങ്ങോട്ടോ പോയി.എന്താ എന്റെ കുഞ്ഞൂട്ടനോട് പറയേണ്ടത് എന്ന് പോലും കുറിഞ്ഞിക്ക് അറിയില്ല ഇപ്പോൾ.

കുഞ്ഞൂട്ട... നമ്മൾ പരസ്പരം ഒരുപാട് മിസ്സ്‌ ചെയ്യും എന്നത് ഉറപ്പാ. എന്നെ ഓർത്തു വിഷമിക്കരുത്. ഞാൻ പിരിഞ്ഞാൽ ഒരു കൂട്ട് ഇല്ലാതെ കുഞ്ഞൂട്ടൻ ശരിക്കും ഒറ്റപ്പെടും എന്നറിയാം.മനുഷ്യരെ പോലെ

ഡിപ്രെഷൻ ഒന്നും ആയി വയ്യാതെ ആകരുത്. കുഞ്ഞൂട്ടൻ വിഷമിച്ചിരിക്കുമ്പോൾ...

സാരമില്ല എന്ന് പോലും പറഞ്ഞു അശ്വസിപ്പിക്കാൻ എനിക്ക് പറ്റുന്നില്ല.

കൂടുതൽ ഒന്നും പറയാൻ പറ്റുന്നില്ല കുഞ്ഞൂട്ട....

നിർത്തിക്കോട്ടെ....ഞാൻ ??

ഇനി കുഞ്ഞൂട്ടനെ കാണുന്നത് പോയിട്ട് കുഞ്ഞൂട്ടന് ഒരു കത്തെഴുതാൻ പോലും എനിക്ക് ഇനി പറ്റുമോ എന്നറിയില്ല.

ഒരുപാട് ഒരുപാട് ഒരുപാട് സ്നേഹത്തോടെ.....

                      കുഞ്ഞൂട്ടന്റെ കുറിഞ്ഞി

കുറിഞ്ഞിയുടെ കുഞ്ഞൂട്ടൻ!!

പ്രീയ കുറിഞ്ഞി...

എന്തുണ്ട് വിശേഷങ്ങൾ? സുഖമാണോ? അവിടെ കാറ്റും മഴയും കൂടുതൽ ആണെന്ന് വിഡ്ഢിപ്പെട്ടിയിൽ ആരോ പറയുന്നത് കേട്ടു. നീ സേഫ് ആണെന്ന് കരുതുന്നു.അവിടെ ഇടിമിന്നൽ നന്നായി ഉള്ളതിനാൽ നിന്റെ മുതലാളി എന്റെ മച്ചാനുമായി ഇടിച്ചു പിരിഞ്ഞത് നീ അറിഞ്ഞോ കുറിഞ്ഞി?? മഴക്കാലത്ത് നീ കുഞ്ഞുടുപ്പിനുള്ളിൽ കയറി നന്നായി പുതച്ചു മൂടി കിടക്കണം. അസുഖങ്ങൾ പെട്ടെന്ന് വരുന്ന കാലമാണ് മഴക്കാലം.

ഇവിടെ ഞാനും മഴക്കാലത്തിനായുള്ള കാത്തിരിപ്പിൽ ആണ്. വേനൽ ചൂടിന്റെ ക്ഷീണം എന്നെ വല്ലാതെ ബാധിച്ചിട്ടുണ്ട്.തണുപ്പ് തുടങ്ങിയിട്ട് വേണം നിന്നെയും ഓർത്തു എനിക്ക് രാത്രിയിൽ ആകാശം മുട്ടെ എത്തി നോക്കി കിടക്കാൻ.നക്ഷത്രങ്ങൾ എല്ലാം കാണുന്നുണ്ട് എന്നല്ലേ. നക്ഷത്രകണ്ണിലൂടെ നിന്റെ വിശേഷങ്ങൾ അറിയാൻ ഞാനും മുടങ്ങാതെ ശ്രമിക്കുന്നുണ്ട് ഇപ്പോൾ.

നിന്റെ മുതലാളി എന്റെ മച്ചമ്പിയുമായുള്ള ബിസിനസ്സുകൾ നിർത്തിക്കൊണ്ട് കരാറുകൾ ചുരുട്ടിക്കൂട്ടി ഉണ്ടംപൊരി ഉണ്ടാക്കി, കാറ്റിലൂടെ കടലിലെറിഞ്ഞു മോറട്ടോറിയം പ്രഖ്യാപിച്ചു... മോന്തയും വീർപ്പിച്ചു പിരിഞ്ഞു പോയതിനാൽ.... അത് എന്റെ മച്ചമ്പിയെ പോലെ തന്നെ, ശാരീരികമായും മാനസികമായും എന്നെയും വല്ലാതെ ബാധിച്ചു.അല്ലേലും നിലനിർത്തി കൊണ്ട് പോകുവാൻ ഉള്ള ചങ്കൂറ്റത്തിന്റെ ആയിരത്തിൽ ഒന്ന് വേണ്ടല്ലോ എന്ത് കാര്യവും അവസാനിപ്പിക്കാൻ!!

അവർ തമ്മിലുള്ള ബിസിനസ്സ് ഇടപാടുകൾ മാത്രമാണ് എനിക്ക് കുറിഞ്ഞിയെ കേൾക്കാനും മിണ്ടാനുമുണ്ടായിരുന്ന ഏക മാർഗം!!

ഒരു ആവേശത്തിൽ വലിച്ചെറിഞ്ഞു പോകാനുള്ള ബിസിനസ്സ് ബന്ധങ്ങൾ ജീവിതത്തിൽ ഒരുപാട് നഷ്ടങ്ങൾ നൽകുക തന്നെ ചെയ്യും എന്നത് എന്റെയും കൂടി അനുഭവം ആണ്.അത് തിരിച്ചറിഞ്ഞു വരുമ്പോഴേയ്ക്ക് ഒരുപക്ഷെ എല്ലാ മുതൽമുടക്കും കൈവിട്ടു പോയി വലിയൊരു തകർച്ചയിൽ എത്തിയിട്ടുണ്ടാകും പലരും. ഒരുബിസിനസ്സ് ആകുമ്പോൾ അഭിപ്രായ വ്യത്യാസങ്ങളും വഴക്കുകളും സ്വാഭാവികം.അങ്ങനെ ഇല്ലാത്ത ഒരു ബിസിനസ്സ് ബന്ധങ്ങളും ലോകത്തില്ല എന്നത് ആണ് സത്യം എന്നത് കുറിഞ്ഞിക്ക് അറിയോ??

വഴക്കുകൾ പരസ്പര ബിസിനസ്സുകൾ ഒറ്റയടിക്ക് അവസാനിപ്പിക്കാനുള്ള മാർഗങ്ങൾ അല്ല, മറിച്ച് പരസ്പര വൈരുധ്യങ്ങൾ, പൊരുത്തക്കേടുകൾ, അഭിപ്രായ വ്യത്യാസങ്ങൾ എല്ലാം തിരിച്ചറിഞ്ഞു, പാളിച്ചകൾ തിരുത്തിക്കൊണ്ട്..കൃത്യമായ വരവ് ചിലവ് കണക്കുകളോടെ.. വ്യക്തമായ ഭാവി പ്ലാനുകളോടെ... മുന്നോട്ട് പോകാനുള്ള യഥാർത്ഥ

അവസരങ്ങൾ ആണെന്നത് ആണ് പച്ചയായ സത്യം.ഏ റീയൽ ഗോൾഡൻ ഓപ്പർച്യൂണിറ്റി!!

പക്ഷെ... മനസ്സിനേറ്റ മുറിവുകൾ!!!

ഓരോന്ന് പറഞ്ഞു ഞാൻ കാടുകയറി അല്ലെ കുറിഞ്ഞി?? ഇതിന്റെ പേരിൽ നിന്റെ മുതലാളിയെ പോലെ നീയും വഴക്കുണ്ടാക്കി എങ്ങോട്ടോ ഇറങ്ങി പോകരുത് ട്ടോ. നീ അങ്ങിനെ പെരുമാറും എന്ന് ഞാൻ കരുതുന്നില്ല.കാരണം.... എനിക്കും നിനക്കും പരസ്പ്പരം ഈഗോകൾ ഇല്ലല്ലോ!!

ഒരു കാര്യം പറയാൻ മറന്നു, വടക്കേലെ പ്ലീയുർ മാവിന്റെ വലിയ കൊമ്പ് ഇന്നലത്തെ കാറ്റിൽ ഒടിഞ്ഞു വീണു. പാവം മാവമ്മാവൻ. നന്നായി വേദനിച്ചിട്ടുണ്ടാകും. എനിക്കും സങ്കടമായി... പഴുത്ത മാമ്പഴജ്യൂസ് കൊണ്ടൊരു നവധാര നിനക്കായി ഞാൻ പറഞ്ഞു വച്ചിരുന്നതാ കുറിഞ്ഞി.

പിന്നെ... നിളയിൽ പൊടിമീനുകൾ നിറഞ്ഞു എന്ന് ശങ്കുമ്മാവൻ ഇന്ന് രാവിലെ പറയുന്നത് കേട്ടു.നിനക്കും നിന്റെ മുതലാളിക്കും പൊടി മീനുകൾ, വറുത്ത് കറുമുറാ തിന്നുന്ന രുചി കൂട്ടാണെന്ന് എനിക്കറിയാം. പക്ഷെ... ഞാനൊരു രഹസ്യം പറയട്ടെ??

നീ മുടങ്ങാതെ.... കിടന്നു മുള്ളിയിരുന്ന കാലത്തേക്കാൾ കാക്കത്തൊള്ളായിരം വർഷം പഴക്കമുള്ളോരു രഹസ്യം.

 "പൊടിമീനുകൾ ആണ് ലോകത്തിലെ ആദ്യത്തെ മസ്സാജ് പാർലർ ഉടമകൾ!!" ഇത് നിനക്കറിയാമായിരുന്നോ കുറിഞ്ഞി??

പുഴയിൽ ഇറങ്ങി അവരുമായി ചങ്ങാത്തത്തിൽ ആയാൽ പിന്നെ അവർ കൂട്ടമായി ഒരു വരവാ...

എന്നിട്ട് ആദ്യം നമുക്ക് ചുറ്റിനും ഒന്ന് കറങ്ങും, ആ വഴി പോയപ്പോൾ വെറുതെ വന്നതാ എന്ന ഭാവത്തിൽ!!

നമ്മൾ ഉപദ്രവിക്കില്ല എന്ന് കണ്ടാൽ... കൂട്ടത്തിലെ കറുമ്പൻ വെള്ളത്തിനു മുകളിൽ വന്ന് മറ്റു ശത്രുക്കൾ ആരേലുമുണ്ടോ എന്നൊന്ന് എത്തി നോക്കി മടങ്ങും. പിന്നീട് ഒരു 10 സെക്കന്റ് കൂടി നമ്മൾ അനങ്ങാതെ നിന്നാൽ.... ഓരോരുത്തർ ആയി വന്നു നമ്മളെ ഒന്ന് തോണ്ടിയിട്ട് ഓടും. എന്നിട്ടും നമ്മൾ കുഴപ്പക്കാരല്ല എന്ന് മനസ്സിലാക്കിയാൽ.. എല്ലാരും കൂടി നാലുവശത്തു നിന്നും കൂട്ടം കൂടി നിന്ന് അവരുടെ ഇത്തിരി പല്ലും കുഞ്ഞൻ ചുണ്ടുകളും കൊണ്ടും ഇക്കിളിപ്പെടുത്തിക്കൊണ്ട് മസ്സാജ് തുടങ്ങും.നല്ല രസമാണ്.പറഞ്ഞറിയിക്കാൻ പറ്റാത്ത ഒരു സുഖം!!

നീ വരുന്ന കാലം നിനക്കായി ഒരു സ്പെഷ്യൽ മസ്സാജ് പുഴയുടെ 9 ആം ഷട്ടറിന്റെ മുന്നിലെ പൊടിമീൻ കൂട്ടങ്ങൾ ഏറ്റിരുന്നതാണ്. എന്നെങ്കിലും ഒരിക്കൽ നിന്നെയും കൂട്ടി പെരുമഴയത്ത് നിളയിലെ പാലത്തിനടിയിൽ വരെ നീന്തി മടുക്കണം എന്നും കരുതിയിരുന്നു.പക്ഷെ..ഇനി നിനക്ക് വരാനാകുമോ എന്ന് എനിക്ക് അറിയില്ല!!

പെയ്തൊഴിയാൻ വെമ്പുന്ന വലിയൊരു മഴക്കാലം... മഴയെ സ്നേഹിക്കുന്ന നിനക്കായി.. നീ അറിയാതെ.. ഞാനും സൂക്ഷിച്ചിരുന്നു.ആലിപ്പഴം പൊഴിച്ചുകൊണ്ട് നിന്നിൽ പ്രളയമായി ഒഴുകുവാൻ കൊതിച്ചൊരു പെരുമഴക്കാലം!! പെയ്യുവാൻ ഭൂമിയില്ലേൽ പിന്നെന്തിനു മഴ.

ഓരോന്ന് പറഞ്ഞു ഞാൻ നിന്നെ വീണ്ടും ബോർ അടിപ്പിച്ചോ കുറിഞ്ഞി?? 

എനിക്ക് "ഫ്രണ്ട്" എന്ന് പറയാൻ വേറെ ആരുമില്ലാത്ത കൊണ്ടാണ് ട്ടോ ഇങ്ങനെ ഓരോന്ന്...വാ തോരാതെ.........

സാരമില്ല!!. 

നീ അതൊന്നും മൈൻഡ് ചെയ്യണ്ട. നിന്റെ മുതലാളി എന്റെ മച്ചമ്പിയുമായി ഇനി ഒരു ബിസിനസ്സിനും തയ്യാർ ആകാതെ നിസ്സാര ഈഗോ വിജയത്തിന് പുറകെ പോയി വാശിക്ക് ഇരുന്നാൽ...ഒരുപക്ഷെ...ഇനി നമ്മൾ  തമ്മിൽ ഒരിക്കലും കണ്ടു എന്ന് വരില്ല.

അങ്ങിനെ എങ്കിൽ... മുതലാളിയെ അനുസരിക്കണം. നല്ല കുട്ടിയായി വളരണം.തർക്കിക്കാനും വാദിച്ചു ജയിക്കാനും അറിയാത്ത കൊണ്ടല്ല പല തർക്കങ്ങളിലും ഒരാൾ പിന്മാറുന്നത്. എതിർ ഭാഗത്ത് ഉള്ള ആളോടുള്ള സ്നേഹം കൊണ്ട് സ്വയം തോറ്റു കൊടുക്കുന്നതാണ്.അതാണ്‌ സത്യം!!

പറ്റിയാൽ എന്നെങ്കിലും ഒരിക്കൽ എന്റെ നാട്ടിലുടെ വരണം.എന്നെ കാണുവാനുള്ള അനുവാദം നിനക്കില്ല എങ്കിൽ പോലും,ഞാനറിയാതെ....നീ വരണ!!

വരിക്കാശ്ശേരി മനയും... നിളാ നദിയും അതിന്റെ തരിമണൽ തീരവും.. വാഴാലിക്കാവും..... കലാമണ്ഡലവും... കുഞ്ചൻ സ്മാരകവും... പുനർജനി നൂഴലും... ഇവിടുത്തെ ഉത്സവങ്ങളും പൂരങ്ങളും...കാവശ്ശേരി വെടിക്കെട്ടും വല്ലങ്കി വേലയും... ഇപ്പോഴും പഴമ നിലനിൽക്കുന്ന നാട്ടിൻപുറങ്ങളും... നന്മയുള്ള നാട്ടാരും...എല്ലാം ചേർന്നുള്ള "വള്ളുവനാട്" എന്നറിയപ്പെടുന്ന ഈ പ്രദേശം.... നിന്റെ മുതലാളിയെ പോലെ എല്ലാം കൊണ്ടും അതിമനോഹരം ആണ്!! 

കൊല്ലങ്കോട് കൊട്ടാരവും ചുറ്റിനുമുള്ള ഗ്രാമ ഭംഗിയും,നെല്ലിയാമ്പതിയും സൈലന്റ് വാലിയും...എല്ലാം കൂടി നിനക്കും നിന്റെ മുതലാളിക്കും ഇഷ്ടമാകും എന്നത് ഉറപ്പ്!!

കുറിഞ്ഞി...

മുതലാളിയുടെ അനുവാദം ഇല്ലാതെ നിനക്ക് എന്നോട് വേണമെന്ന് വച്ചാൽ പോലും മിണ്ടുവാൻ പോലും പറ്റില്ല എന്നറിയാം.എങ്കിലും....

.......... 

............

എത്ര പറഞ്ഞാലും തീരാത്ത വിശേഷങ്ങളും കഥകളും നിന്നോട് പറയാൻ എന്നിൽ ബാക്കിയുണ്ട്.പക്ഷെ.. എനിക്ക് പേടിയാണ് ഇപ്പോൾ.നിന്റെ മുതലാളിയെ പോലെ...

നിസ്സാര കാര്യത്തിന് വഴക്കുണ്ടാക്കി പോകാൻ ഒരുപക്ഷെ നീയും തയ്യാർ ആയെങ്കിലോ??

ഇനി എന്തേലും നിനക്കായി കുറിച്ചാൽ അത് ഒരുപക്ഷെ അധികപ്പറ്റാകും കുറിഞ്ഞി.

                                 സസ്നേഹം...

                  കുറിഞ്ഞിയുടെ കുഞ്ഞൂട്ടൻ

Ps: കുറിഞ്ഞിയും കുഞ്ഞൂട്ടനും പ്രതേകാത്മക തൊഴിലാളികൾ ആണ്. മുതലാളിമാരുടെ നിസ്സാര വാശിക്കും ഈഗോയ്ക്കും മുന്നിൽ പരസ്പരം പിരിഞ്ഞു പോകേണ്ടിവരുന്ന.... ഒരിക്കലും തമ്മിൽ കാണാത്ത വെറും രണ്ട് നിസ്സഹായ തൊഴിലാളികൾ!!